Сустрэча раённага дома рамёстваў з калектывам дашкольнай установы “Яслі-сад № 4 г.Ганцавічы”

26 верасня Ганцавіцкі раённы дом рамёстваў наведаў калектыў дашкольнай установы “Яслі-сад № 4 г.Ганцавічы”.  Падчас сустрэчы госці прынялі ўдзел у агляднай экскурсіі па экспазіцыях Дома рамёстваў, якую правяла дырэктар установы Ала Васільеўна Занька. Майстар Алена Мікалаеўна Цялушка займальна пазнаёміла прысутных з тэхнікай прадзення льняной ніткі з дапамогай  пралкі і верацяна. Усім жадаючым было прапанавана  ўласнаручна паспрабаваць зразумець механізм прадзення і дабыць з кудзелі танюсенюкую нітачку.

         Сваё майстэрства падчас сустрэчы прадэманстравалі майстры народных промыслаў (рамёстваў) Алена Мікалаеўна Цялушка і Таццяна Сцяпанаўна Зялёнка, якія пазнаёмілі наведвальнікаў з дзейнасцю творчай майстэрні па ткацтве, дзе кожны з гасцей меў магчымасць паспрабаваць сябе за кроснамі.

         З захапленнем удзельнікі сустрэчы наведалі выставу  “Народныя майстры Ганцаўшчыны”, на якой былі прадстаўлены работы Народных майстроў Рэспублікі Беларусь Феаніі Крысюк, Ульяны Віннік, Ніны Казак і Віталія Шэпялевіча.

         На прыканцы праграмы быў арганізаваны майстар-клас па кропкавым роспісу, які правяла кіраўнік народнага клуба майстроў народнай творчасці “Багач” Наталля Іванаўна Фартавая. Акрамя гэтага майстар народных промыслаў і рамёстваў Валянціна Паўлаўна Курылік пазнаёміла наведвальнікаў з тэхнікай выцінанкі.

         Вось так цікава, займальна, а самае галоўнае – пазнавальна і карысна правялі вольны час госці нашай сустрэчы, а таксама даведаліся шмат новага!