Версия для слабовидящих

+375 (1646) 2-15-45

email: ideolog24338@brest.by

mini

СВЯТЫ ВЁСАК «ТУТ МАЕ КАРАНІ»

10-11 жніўня бягучага года ў раёне традыцыйна пачаліся святы вёсак — свята, якое так любяць і чакаюць вяскоўцы. Да яго рыхтуюцца ўсе: арганізатары, жыхары вёсак, і вядома ж, тыя, хто тут нарадзіўся, вырас і па розных прычынах пакінуў малую радзіму. Бо няма нічога даражэй вузенькай сцежачкі да роднай хаты і сустрэчы з землякамі. Святы адбыліся ў аг.Малькавічы, в.Дзяніскавічы,  в.Палонь і Задуб’е. Многа добрых і цёплых слоў было сказана пра людзей, якія тут жывуць і працай упрыгожваюць сваю вёску, віншаванні прагучалі старажылам, юбілярам, маладажонам і шматдзетным сем’ям. Землякоў і гасцей вёсак  віталі: старшыні Дзяніскавіцкага Дубоўская Людміла Міхайлаўна, Малькавіцкага Літвіновіч Таццяна Васільеўна,  Люсінскага  Шкут  Вячаслаў Аляксандравіч сельвыканкамаў. Шчырыя словы землякам і падарунак калектыву паштовай сувязі прывезла Галіна Мікалаеўна Пупач, галоўны рэдактар газеты «Савецкае Палессе».  Да позняга вечара звінела свята ў вёсках, тут кожны мог знайсці сабе занятак. Працавалі дзіцячыя атракцыёны, гульнёвыя пляцоўкі, выставы дэкаратыўна-прыкладнога мастацтва і тарговыя рады. А якое ж свята без песень і сяброў. Самадзейныя артысты Агарэвіцкага сельскага Дома культуры завіталі з канцэртнай праграмай у аг.Малькавічы і вёску Задуб’е, В.Круговіцкага сельскага клуба ў в.Дзяніскавічы, свае лепшыя песні падарылі артысты Ганцавіцкага Дома народнай творчасці суседзям з в.Палонь. Праведзеныя мерапрыемствы знайшлі добры водгук  у мясцовых жыхароў.

 

18 жніўня свята вёскі прайшло у в.Макава. У госці да вяскоўцаў завіталі самадзейныя артысты з Люсінскага сельскага клуба.

17-18 жніўня прайшлі святы вёсак у вёсках В.Круговічы, Нач, Макава, М.Круговічы. Шматлюдна было у аг.Хатынічы.

«Тут самае высокае неба, самыя зялёныя дрэвы, самыя добрыя і ветлівыя людзі». З гэтых цёплых слоў пачалося ў нядзелю свята вёскі ў Хатынічах.

У парку каля Хатыніцкага сельскага Дома культуры сабраліся некалькі сотняў мясцовых жыхароў усіх узростаў і госці, якія жывуць сёння ў райцэнтры або сталіцы. Лавачкі, пастаўленыя насупраць сцэны, у выніку не змаглі змясціць усіх жадаючых. Ды шмат каму яны і не былі патрэбныя: хтосьці аддаваў перавагу хавацца ў цені, хтосьці з задавальненнем прытанцоўваў пад запальныя песні ў выкананні артыстаў Хатыніцкага Дома культуры, а большасць юных удзельнікаў свята не маглі ўседзець на месцы – столькі вакол было ўсяго цікавага!

Вялікая ўвага надавалася навядзенню парадку на зямлі. Дамамі ўзорнага парадку прызнаныя домаўладанні Волаха Уладзіміра Анатольевіча і Тамары Сяргееўны, Канановіча Васіля Мікалаевіча і Таццяны Якаўлеўны, Канановіча Івана Мікалаевіча і Наталлі Міхайлаўны, Канановіча Уладзіміра Уладзіміравіча і Ірыны Міхайлаўны, Майсюка Аляксандра Іванавіча і Таццяны Мікалаеўны.